[شدا]

(( العنود))

لا شموخ وكبرياء وأنـف يرقـى للسنـود-والقضيه أكبر أكبر مـن شموخـي وإدِبـي

للجهاله إيه والله فـزت فـي كـل البنـود-والغباء لكل شخـص ٍ مايقّـر إنـي غبـي

أستبّد وكنـي اللـي ماخلـق مثلـه إسـود-لين داور هالزمان وقص خشمـي وشنبـي

إيه راحت وتركتني ويمكـن إنـه ماتعـود-وداست برجله لعانه وجـه قلبـي وأهبـي

وكرّمتني فوق نزفـي وشكرتنـي للجهـود-وقالت إنت وبإحتقـار ودق كفّـه منكبـي

من تكون ومن أكون وطول عمرك لو تسود-ماربطني مع شتاتـك إلا يمكـن مذهبـي

حمّلتني فوق وسعي وأكبر حلولي صمـود-والصمود لغير موقف مثـل هـذا مطلبـي

وطحت كني في مكاني شي تافـه مايكـود-حتى أرض ٍ إحتوتنـي ماتحفّـت بركبـي

كني اللي حاصل ٍ له دعوة ٍ من قلب عـود-وافقت له إستجابـه وإستـوى لـه مايبـي

وش عليها يوم راحت وتركتنـي للشـرود-وشبّت النار بيدينـي وإستعانـت بحطبـي

وش عليها يوم سـوّت إحتفـالات الهنـود-ورسمت رمز الضحيه فوق عيني وهدبـي

وشكّلت قلبـي طبـول وقدّمتهـا للحشـود-وإستعانت في حلاها وإستقالـت منصبـي

وإستلذّت صوت قلبي لا تعلاّ صوت عـود-وإستغلّت كـل درب ٍ يـم رومـا وتعبـي

ليت وقت ٍ قد مضى لي قبل حرمان الصدود-يغدي الدرب ويجيني أو أجي له لو حبـي

يوم فوحي من غلاها ريح مسك وريح عود-وإن سكت لغير قصدي قالت آمر وش تبي

نقهر عبله عليهـا وسـط طيّـات العقـود-وأقهر العبسي بحب ٍ دون سيف ومشعبـي

لامشتني مع دروبي وأصعب دروبي حسود-كن قلبه قلب ذيب ٍ وسط جوف ٍ في ضبـي

ترسم بريده بكفـي مالهـا حكـم وحـدود-وأنثر الطايف عليهـا بالقصيـد المغربـي

كرّهتني في حياتـي وأنكرتنـي للجحـود-يوم فازت في ضياعي وإستملّـت ملعبـي

إرجعي لي لو سمحتي إرجعي لي يالعنـود-دام قلبي يوم رحتي في ضلوعـي مختبـي

مايفيد الحـال بعـدك لانيـاف ولا خلـود-وش يسوّي كل مكسب دامك أنتي مكسبـي

إذبحيني لو بغيتي وإلغي إسمـي بالوجـود-وإكتبيني تحت عطفـك دام بيـدك مخلبـي

وكان خفتي مـن خيانـه قيّدينـي بالقيـود-وعقّدي لي تحت نمله وسط غار ٍ مرعبـي

ماعليّ من الملامـه والاهانـه لـو تـزود-والرجولـه مانبيهـا لا نويتـي تقـربـي

واجد اللي يحسبون الحـب تفتيـل الزنـود-ظافرين وكل واحـد بنـت قلبـه تنسبـي

الدعايه دبلجتهم من شمـوخ وبيـت جـود-في بحور ٍ لو تبعته كـان يغـرق مركبـي

ماعلينا إرجعي لي لـو سمحتـي يالعنـود-دامك أنتي أكبر أكبر من شموخـي وإدِبـي

وصدّقيني لو يحول الوقت دونـك بالسـدود- ما أنكر إنك يوم رحتي طحت واثق بركبي