[! ابــو أيهــم !]

بسم الله الرحمن الرحيم

انا فتاه من عائله محافظه بل عائله ملتزمه الى حد ما نشأت وتربيت تربيه دينيه

وفي يوما من الأيام قالت لي صديقتي ليش ماعندك ايميل قلت لها مااعرف اسوي ايميل قالت حتى انا
وقتها انا ماسألتها مين سوا لك الإيميل

كلمت اخوي قلت له ابيك تسوي ايميل قال ماني فاضي لك انتي سوي لك حوسي فيه الين ماتعرفينه وانا كنت مفكره ادخل بالايميل بعض المنتديات الي مااقدر ادخلها الا بتسجيل

المهم دخلت الشات علي الاقي احد يسوي لي ايميل لقيت شاب قال انا راح اسوي لك ايميل قلت الله يجزاك خير

هو سوا الايميل وضاف نفسه في الايميل وماكنت افهم شي بالايميل وقتها

انا دخلت الشات ابي احد يسوي لي ايميل مو القصد اني اتعرف وانا ادري اني غلطت بدخلتي للشات لان مابني على باطل فهو باطل

مرت الايام وزادت علاقتي بهالشاب هو من دوله وانا من دوله اخرى وكل ماتمر سنه تزيد علاقتنا اكثر واكثر
الين ماجا اليوم الي افترقنا فيه ايميلي تقفل وكان ايميله بداخله

كنت اعيش كل يوم علشان الاقيه وكان من المستحيل اني ألقاه
وبعدين لقيته في ايميل ثاني ماكنت افتحه كثير والفراق تقريبا استمر اكثر من 8شهور

رجعنا لبعض بقوه اكثر من أول ولما كان أول لقاء ضغط علي وقال لنا سنتين كله على الماسنجر انتي ماتثقي فيني وكثر الزن يفك لحام الحديد هو يبيني اعطيه رقم تلفوني وبلحضه ساعدني الشيطان فيها وخنت اهلي الي ربوني على الأدب والدين عطيته رقمي

وأنا والله العظيم اني احترق من داخلي بس شسوي الشيطان شاطر

المهم ظل يتصل علي وانا ماأقول الا كلمه أو كلمتين ماأتمادى حتى كان يقول كيفك شخبارك استحي مااتكلم يالله يالله كلمه كلمتين

وظل يتصل مره مرتين عشرات المرات بس أنا بداخلي احس اني خنت اهلي وكل ماأقفل منه أبكي دموع ندم وماأنام زين بوقتها طبعا هو مايدري عن تأنيب الضمير بعد كل مكالمه

بعدها ظل يتصل ومااقدر ارد مرضت وتعبت وانقطعت لاني كنت اتعالج

ولما عرف بمرضي بكى وبكيت أنا الين ربي ماكتب لي الشفاء

ولما رديت كنا نتقابل انا وياه على الماسنجر وأحيانا على التليفون
وقتها كملت علاقتنا اربع سنوات

وقبل لانحتفل في السنه الرابعه وندخل في السنه الخامسه صار شي مو طبيعي

جلس اسبوعين مادخل الماسنجر واحنا صارت عندنا حاله وفاه

بعدها دخل حسيت فيه شي بس ماأدري أيش هو قال بالحرف الواحد يالجوهره أنا ألتزمت

والله العظيم ماتتصورون قد أيش فرحت لما شفته كتب هالكلمه ونزلت دموعي لاشعوريا

وللمعلوميه أنا وهو محافظين على الصلاه وكنا نصحي بعض لصلاه الفجر قبل الهدايه طبعا

هو أستغرب من رده فعلي اني فرحت له لما التزم قال توقعت رده فعلك غير

قلت أنا أحبك وأتمنى لك الخير كيف ماتبيني أفرح

صار يرسل لي قصص ومواعظ على الأيميل هو الي دلني على موقعكم وعلى موقع طريق الإيمان كان يرسل لي مواعظ ومقالات

كان يحثني على حفظ القران وأنا الان ألتزمت على إيده والحمدلله صرت محافظه على النوافل وعلى الصيام وتكرت الأغاني وحاليا أحفظ القران

وأنا من هالموقع أتمنى منك أنكم تدعون للشاب بأخلص الدعوات بأن ربي يثبته ويسعده دنيا واخره ويسهل دربه ويوفقه في دراسته وأن ربي يسهل له كل صعب

وأنا أدعو لي بأن ربي يثبتني ويتقبل توبتي ويشرح صدري ويسهل لي حفظ القران

حاليا الشاب تقدم لخطبتي لأننا تركنا بعض لوجه الله وكلمني بالموضوع ويبي معلومات عنا بس أنا متردده كيف أقول لأهلي من وين عرفته صعب أقولهم من النت
حنا مجتمعنا شرقي يرفض مثل هالتعارف

أنا تبت وهو تاب أنا أستخرت وهو أستخار أنا أستخرت في مكه وحسيت نفسي مرتاحه له

وأنا ميقنه أني ماراح ألاقي واحد مثله يعيني في أمور الدنيا والأخره لأنه ملتزم

منقول