الموضوع منقول بس حبيت أعرف رايكم
مرة سمعت الجملة دي: أحيانا الواحد بيحس إن باباه ومامته بيستغلوا ان ربنا أمرنا ببرهم في إنهم يتحكموا في حياتنا.
هم أهلنا واحنا المفروض تبعا لبر الوالدين نسمع كلامهم ونريحهم علشان ما يبقآش عقوق وكده
بس الكلام سهل إنما الحياة العملية حاجة تانية تماما، أصل مش دايما بتبقى الأمور بسيطة بساطة الكلام اللي بيتقال ده.
أحيانا مثلا انت عايز تنزل مشوار من وجهة نظرك مهم جدا، ومن وجهة نظرهم ولا ليه أي لزمة، وعايزينك تقعد في البيت مثلا علشان سبب معين.
هم مقتنعين إن مشوارك مالوش لزمة وانت مقتنع إانه ليه لزمة أوي، وهما مقتنعين ان سببهم قوي وانت مش مقتنع بسببهم ده.
ساعتها هتعمل ايه؟؟ هتحكم رأيك وتنزل ولا هتمتثل لكلامهم؟؟
ولو امتثلت هتمتثل عشان خاطر ما يزعلوش ولا علشان خاطر هما ليهم عليك سلطة؟؟؟
ممكن يبقى فيه نشاط معين انت بتعمله في حياتك … بتروح جمعية خيرية .. بتشتغل في نشاط طلابي مش تبع الدراسة … داخل في اتحاد الطلبة … أي حاجة يعني .. وتلاقي أهلك مش موافقين عليها .. لمجرد انهم مثلا خايفين من التغيير و مش متعودين على كده منك .. عايزينك قاعد قدامهم وخلاص فاضيلهم مش من حقك تقول مرة معلشي مش فاضي بكرة آجي معاكو مشواركو ده مش من حقك تقول ينفع نأجل المشوار ده لتاني يوم .. ساعتها بتطلع بتفضل باقي الحاجات علي عيلتك وماعندكش انتماء ناحيتهم وزي القرع بتمد لبره
ولحد كده برده احنا لسه في السليم لسه بنتكلم في مشوار ونشاط طلابي إنما في بعض الأوقات الموضوع بيوصل لمرحلة مصيرية مش مجرد مشوار أو نشاط بتعمله جنب الكلية لأ ده وصل لحياتك بقى، وصل لأنهم هيحطولك خطوط حياتك وهيطالبوك تمشي عليها … وحق الرفض، مرفوض
أضرب مثال
اليومين دول هما يومين الثانوية العامة والتنسيق ومجموعك يدخلك ايه وانت عايز ايه وأهلك عايزينلك ايه … وروح أي مكتب تنسيق هتلاقي العجب وتسمع أفلام وحوارات
لسه النهارده الصبح واحد زميلي بيشتغل في مكتب من مكاتب التنسيق دول … بيقوللي فيه واحد غير رغباته كذا مرة بسبب أهله … ده الأهل دول حاجة أستغفر الله.
لما الموضوع يوصل لتحديد مصير هتعمل ايه؟؟ هتمتثل لرغباتهم ولا لأحلامك؟؟
مثلا ممكن يكون باباك أو مامتك شايفينك حاجة وبيحلمولك انك تطلع مثلا مهندس قد الدنيا أو دكتور قد الدنيا برده أو أي حاجة قد الدنيا … وانت طموحك انك تبقى قد الدنيا بس في حاجة تانية خالص غير اللي أهلك بيحلموا انهم يحققوها فيك.
في نماذج أعرفها أنا بعتبرها مآسي، أصل مش بيبقى أهله بيحلموله يبقى دكتور مثلا وهو عايز يبقى طبال، لأ خالص ده بيبقى أهله عايزينه دكتور وهو عايز يبقى مهندس أو باباه نفسه يطلع مهندس زيه وهو عايز يبقى محامي .. اللي هو المهنتين محترمين (تبع تقاليد مجتمعنا) بس الفرق ان ده حلمك وده حلم أهلك.
طب ده أنا أعرف واحد في طب أسنان وهو كان عايز يخش سياسة واقتصاد وما بيبقلشي الطب أبدا ومع ذلك أبوه غصب عليه يدخل طب لسبب بسيط جدا: ” يعني مين اللي هيمسك المستشفى؟“
فيه ناس هتقولك هحاول أحقق نفسي في المجالين، أرضي أهلي وفي نفس الوقت أعمل اللي أنا عايزه … اسمحلي ديه أحلام يقظة، لأنك مش هتقدر تشتغل في حاجتين بنفس الكفاءة اللي هتشتغل بيها في حاجة واحدة … وغصب عنك هتلاقي نفسك ميال انك تشتغل في الحاجة اللي بتحبها وبتفضلها على الحاجة التانية … وده معناه ان الشغل اللي مش من أحلامك ده هيقع يعني فلوس ووقت ضاعوا على الفاضي
وأصلا في معظم الحالات بيبقى مثلا أنا عايز أطلع صحفي وأشتغل في الصحافة وبابا عايزني أكمل معاه المشروع اللي عامله علشان خاطري مخصوص .. المجالات متضادة تمامااااا بحيث يستحيل معاها التوفيق بين المجالين وبيبقى لازم تختار بين خيارين كل واحد فهيم أصعب من التاني.
يا إما تحطم أحلام والدك اللي عاش حياته كلها عشان يحققهالك وده معناه إنك تتخلى عن أسطورتك الذاتية وحلمك لحياتك انت، يا إما تحطم أحلامك انت وتعيش حياتك زي ماهو راسمها ليك وده معناه حياة روتينية مملة لأن الإنسان بدون أحلامه وأهدافه بيفقد الرغبة في الحياة للحياة بيبقى عايش وخلاص انما مش عايش للحياة.
على فكرة مافيش إجابة نموذجية، عشان الإجابة بتختلف من شخص للتاني … حسب تربيته وحسب تفكيره وحسب إحساسه بأحلامه أصلا شكله ايه، عشان كده أنا مش قادرة أحط إجابة وأحاول أقنعك بيها لأنه هيفضل كلام نظري والواقع يختلف تمام الإختلاف.
ويبقى السؤال: هل بر الوالدين معناه انهم يملكونا؟؟ وهل ممكن توفق بين انك تحقق أحلامك انت وبين انك ترضي أهلك؟؟
ولو اتحطيت في موقف اختيار، هتختار ايه؟ أحلامك ولا أحلامهم؟