اشهر جمل الاباء المصريين -ههههههههه

[شريف]

أشهر جمل بيقولوها الأب و الأم في مصر




أجدع سلام للمصريين

* امشى جاتك مشش فى ركبك .


* جتها نيلة الى عايزة خلف تيجى تتفرج .


*ذاكر ياموكوس مش فالح غير فى الهيافه والكلام الفاضى.


* ربنا يرزقك بعيل يوريك اللي ورتهوني.


* هات كيس عيش وانت راجع.


* هو ده اللي انت فالح فيه طول اليل والنهار قاعد علي الزفت الكمبيوتر بتاعك لحد مهيجلك تخلف عقلي منه .
(أنا شخصيا بتتقالي الجملة دي كتييييييييييير أوي)


* كل يوم هات هات لمة ربيتلى الهتهات (الحاج طبعا) مع انى مش عارف اية الهتهات ده بس ماشية مع الجملة.


* هتذااااااااكر هتاخد عنيا، مش هتذااااااااااكر هتاخد بالجزمة (هو فى غيرة طبعا الحاج).

*أوعى حد يضحك عليك ويقولك جرب السيجارة دي.


*ابقى ورينى مين حينفعك فى الاخر من شوية الصيع الى انت مشيلى وراهم .


* قوم اقرا لك كلمتين ينفعوك .


* وطي المدعوق ده شويه .


* انت فاكرنا نايمين على ودانا ؟


*لما ما ترضاش تاكل في البيت:طبعا مانت اتعودت علي اكل بره .


*ياريتك تحفظ دروسك زى مانت حافظ الاغانى.


* عيـــب ... لازم تحترم اللي أكبر منك .


* لو شفت خناقه ما لكش دعوة بيها .


* كريم دا عيل بايظ وماتمشيش معاه تاني .
(طب اشمعنى كريم يعني)



* مين منى دي انتى كل يوم تصاحبي واحدة جديدة ؟.


* انته مبتكلش جزر ليه .. اجيبلك برتقانه. طب كل سلطه .


* يابني بأسلوبك ده مش هتعيش معاك واحده .


* قومي ساعدي امك ده اللي هيتجوزك أمه داعية عليه.


* اوعى حد غريب يديلك حاجه تاكلها و تشربها و تاخدها منه .


* يا ابني حرام عليك الى بتعمله فينا ده.


* انا سايبالكوا البيت وماشية ومش حتشوفوا وشي تاني .


* لمى هدومك انتى مش عايشة فى زريبة، بكرة اشوف بيتك هيبقى ازاى خرابة طبعا.


* وانت فاكر احنا مستنيين منك حاجه .


* المسلسل مش هينفعك ...قوم .


*ماتقعد يابنى تكمل أكلك , انت كلت حاجة!!!
(طيب ماهو انا لو جعان أو الأكل عاجبنى إيه اللى هيخلينى أقوم يعنى , هو انا غاوى جوع مثلا )
.


* كفايه رغي في التليفونات .


* كل على مهلك .. وامضغ كويس ... وما تكلش وانت واقف .. وكل من قدامك ما تحفش .


* اطفي التلفزيون وقوم ذاكر ولا خش اوضتك (غرفتك يعني).


* بلاش تمشى حافى البس شبشب وانت داخل الحمام .


* ما فيش مذاكرة على المزيكا .. وازاى بتذاكر و البتاع ده شغال جنبك .


* افرد ظهرك .


* لم شراباتك.


* ماتكلش فى ضوافرك.


* كنت فين لحد دلوقتى يا صايع.


* ماتتأخرش علشان عندك كلية بكرة بدرى.


* انا مش عارف انت طالع لمين.


* انا : ياماما بقه ايه ده ؟؟؟
ماما:مووو لمـا يــــــخدك .


* ادلعى ياهبة فى ايامك المهببة .

* ده منظر اودة بني آدم ، انت عايش فيها ازاي؟.


* هو انا الخدامه الى ابوكم جبهلكم .


* الى يطلع من الاوضه يطفى النور وراه .


*أبوك عندك أهو اتصرف معاه .


* اللي بيشيل قربه مخرومة بتخر عليه لوحده ..


* لو مش فاهم حاجه ارفع ايدك و قول للأستاذ مش فاهم .. متتكسفش .


* البس فنله قطن تحت ودفي سدرك ودخل التيشرت في بنطلون البيجامه وانته نايم .


* يأبنى المذاكره مابتخلص .... نفسى اشوفك مره ماسك كتاب.


* اعمل حسابك مش حندخلك جامعه خاصه.


* قالب ليلك نهارك، طول الليل صاحى وطول النهار نايم
طبعاً ما حضرتش ولا محاضرة ولا سكشن , وطول اليوم صايع بره البيت .


* مالكش دعوة بالسياسة .. وماتمشيش في مظاهرات .و امشي جوا الحيط .


* احمد ربنا الاكل الى مش عجبك ده فى ناس مش لقينه .


* التهديدات المخيفه والمرعبه مثل: هأقطم رقبتك أو هأقطع ايدك أو هأقطع لك لسانك أو هأدبحك دبح .


* قومي سخني الأكل لأخوكي.


* ابوكم كان دايم بيطلع الاول على الفصل... " لما كلهم كده امال مين الى بيطلع الاخير" .

* ومن اشهر الجمل الى بتتقال كل يوم بعد الاكل :
انا مش الخدامه اللي اشترهاكوا ابوكوا اللي ياكل في طبق او يشرب في كباية يغسلها ما يركنهاش في الحوض.


* و أخيرا ::

ضرب امثلة تشجع على الكفاح و أشهرها أحد الأقارب اللي كان بيذاكر على لمبة جاز أو على عامود النور الي في الشارع و نجح وخد الدكتوراه وسافر أمريكا ( ٌٌقال يعنى كان بيعرف يركز والناس ماشيه حوليه فى الشارع )

[نبهان]

هههههههههههه ربنا يخلي لنا بابا وماما
عبارات كثيير مابنسمعها بس بصراحة مابنقلهاش في عائلتي أصل والدي ووالدتي طيبين
أشكرك أخي الكريم على الموضوع و أرجو أن تسمح لي بالإضافة
*داك داء السل لما يسلك*
عندما يستحي رجل من امرأة*يابني اللي يختشي من بنت عمه مايجبش منها عيال*
*أقلب القدرة على فومهه تطلع البنت لأمهه*
عند حدوث شجار والدخول للتخليص بين المتشاجرين والإصابة أو قطع الملابس*يابني ماينوب المخلص غير فتح الدماغ*
*ياما جاب الغراب لأمه*
*على فين ياوش النحس*
*راجع منين يااسخام..إيه ريحة السجاير اللي فايحة منك دي*
*كان يوم ... يوم ماجبتك*
من الدعاوي*ربنا يفتحه في وشك*
*ربنا يرزق بأتوبيس سياحة يكون صاحبة مصطول*

[المحبة للإسلام]

هههههههههههههههههه
مشكووووور أخي
بصراحة موضوع يجننننن
باركـ الله فيكـ
أجدع سلام للمصريين

[شريف]

@ نبهان
بارك الله فيك
ربنا يبارك لك في ابويك

بس أنا ما شفتش حد ما بيقولش الكلمات دي

أنا حازعل من اللي عندي
هههههههههه

@المحبة للإسلام
أجدع تحية للجزائريين ولك أختي الكريمة

[راضية82]

أجدع سلام للمصريين
و لشريف المصري سلام مربع
موضوع شيق
ربنا يكرمك

[شريف]

المشاركة الأصلية كتبت بواسطة راضية82

أجدع سلام للمصريين
و لشريف المصري سلام مربع
موضوع شيق
ربنا يكرمك

الله يكرمك يا راضية ويعينك على كل خير يارب

[mina]

--------------------------------------------------------------------------------

هههههههههههههههههه
مشكووووور أخي
بصراحة موضوع يجننننن
باركـ الله فيكـ

[شريف]

@mina
جزاك الله كل خير