بناتي الصغار والصلاة

[الفراشة المتألقة]

المشاركة الأصلية كتبت بواسطة راغبة في رضا الله

البنات منيحين يقبشوا قلبي صايرين عم يحكوا شوية كلمات وعم يسمعوا كلامي احيانا ,يعني ماسة لما بصلي بتحب توقف قدامي بالاول كانت تسجد معي وبعدين صارت مشاغبة بتعطلني عن الصلاة بحركتها الزايدة قمت عيطت عليها مرتين تلاتة انه لازم تقعد جنبي لحتى خلص وما شاء الله عليها صارت تفهم تقعد جنبي لحتى خلص وبس خلص بضمها ,اما لين الله يرضى عليها ما احتاجت اني عيط عليها خلص قلت مافي حدا يوقف قدامي بتبعد هي لورا وبتصير تلعب باي شي لبين ماخلص ,اليوم كنت عم صلي العصر قامت ماسة الشقية طلعت عالكرسي تبع الكمبيوتر وضلت تتحرك لحتى وقع الكرسي الحمدلله ما تصوبت بس خافت واجت تركض لعندي وهي عم تبكي : ماما بتبت دي بتي ما ..هيك كلام مو مفهوم انه يعني عم تشكيلي من الكرسي وانا ويلي بدي ركز بالصلاة وويلي بدي ابكي زعلانة عليها وويلي بدي اضحك من كلامها وبعدين قعدت جنبي تستناني لبين ما خلصت وضميتها ,الحمدلله على كل حال ,متل ماقلتي حبيبتي الولاد الصغار بينسونا همومنا وبيخففوا عنا

السلام عليكم ورحمة الله وبركاته

أحببت -بعد أخذ الإذن- نسخ هذه القصة لأختنا الطبيبة الطيبة راغبة في رضا الله مع بنتيها التوأم ( لين و ماسة ) اللاتي لم يتجاوزن سنة و 4 شهور ، لأعلق عليها بما يفيدها ويفيد الأمهات اللاتي لديهن أطفال بهذا العمر بإذن الله :


بداية حبيبتي ، أحكيلك أنا بموووووت على عمر سنة ونصف إلى السنتين من الأطفال ، ما ألذهن ، كتير حبابين ، لأنه لسا دوبهن عم يتحركو ، فعم يعملو حركة بالدار ، ومشكلات طفولية بريئة (يوقعوا هاد ويخربشو ع هاد ، وحكياتهن الله الله بتطير العئل) سجليها الهن هالحكيات السكر منشان بكرة تسمعيهن ياها ، وتصير الك تسلاية وتذكارلما يكبرو وينشغلو بدراستهن ، هيك عملت مع إختي ، وكل يوم بتعيد تسمع مو مصدقة انه هي هاي

بالمختصر: هي بوسة لبناتك الأمورات ولكل طفل بهاد العمر

تعليقاتي كالتالي:

1- عندما تتحدثي مع بناتك ، حدثيهم وكأنك تتحدثي مع بالغ.
الطفل بهذا العمر الصغير يفهم كل كلمة ولكن لا يعبر لأنه يفتقد للمفردات ، دليل فهمهن انن عم يسمعوا الكلام الأمورات ، ولكن كل ما يسمعونه منكِ يقوم العقل بتخزينه ، وبعد فترة ستجدي أنهن بدأن بتركيب جمل من خلال المفردات التي تتكرر عليهن ( باب ، كرسي ، ثلاجة ، ماما ، تيتا ..... إلخ ) ولكن بطريقة طفولية أيضا ، أي ممكن أن يختصر الطفل الجملة ولكنه يفهم معناها ، كأن يقول: ماما باب ، أو ماما أتـَّح باب ، يعني ماما افتحي الباب ، أو ماما سأفتح الباب.
وكلما تحدثتي أكثر أعطيتيهن مفردات أكثر ، مما يجعل منهن فصيحات اللسان يتحدثن بطلاقة من عمر سنتين ، لأن مصدر التعلم الآن هو الأم.

انظري لهذه الطفلة عمرها سنتين هنا

وهذه الطفلة أيضا هنا


بالمختصر: عقل الطفل الآن كالإسفنجة ، كل ما يشاهده ويسمعه يلتقطه في ذاكرته ، وفري لهذه الإسفنجة الماء النظيف بكمية كبيرة ، وغدا عندما يبدأ وقت العصر ، ستخرج هذه الإسفنجة كل ما بداخلها على قدر كمية ونوع الماء الذي وفرتيه والطريقة التي ستعطيها فيه مهمة جدا أيضا.


2- الطفل من هذا العمر يبدأ بالتجربة ليعرف ماهو الممنوع وماهو المرغوب ، ويكتسب خبرات.
يولد الطفل وهو صفحة بيضاء لا يوجد عليها شيء ، وما إن يبدأ بالحركة يبدأ رحلات يومية استكشافية ، يجرب كل شيء أمامه ، ولا يعرف ماهي العواقب.
إبنتك عندما وقفت أمامك كانت تجرب ماذا سيحصل ، الحزم مطلوب ولكن ليكن برفق ، فصوتٌ حازم يكفي ، ويوصل الرسالة للطفل ، وهو أنجح أسلوب في التربية.
هي الآن اكتسبت خبرتين:
1- ماما عندما يكون نبرة صوتها هكذا ، وتتحدث بهذه الطريقة ، إذن يجب أن لا أفعل وأتوقف فورا .
2- الوقوف أمامها ممنوع كي لا تغضب مني مرة أخرى.

دليل وصول الرسالة أنها امتثلت لأمرك حتى عندما جاءت لتشتكي من أمر أزعجها انتظرتك كي تكملي صلاتك ، وبعدها تخبرك بما عندها .


3- الطفل يتعلم بالتقليد
في المنهيات في الصلاة ، لين اكتسبت الخبرة من خلال تجربة أختها ، فوجدتيها أخذت الموضوع من الآخر وجلست بجانبك كما طلبتِ من أختها .
هذا الأسلوب كتير كتير مفيد ، استغليه سيريحك في و من كثير أمور .


4- إحتضان الطفل ينمي ذكاؤه .
مهم جدا أن تقوم الأم باحتضان أطفالها ، فهذا يقوي الجانب العاطفي عندهم ، ويزيد إرتباط الطفل بأمه وحبه لها ، ويشعره بالإستقرار النفسي ، وقد اكتشفو قريبا بأن العاطفة لها جزء في الدماغ ، تنمو كما تنمو بقية الأجزاء ، وهي قريبة من مركز الذكاء وتؤثرعليه بدرجة كبيرة.

روت لنا د.نجود في محاضرة بعنوان الذكاء العاطفي أنها درست في أمريكا ، ونزلت تطبيق في روضة كانت تتبع منهج دمج كل الأعمار مع فئات ذوي الإحتياجات الخاصة في فصل واحد ، وكانت بينهم طفلة مصابة بتخلف عقلي بسيط ، فأرادت الدكتورة أن تعرف السبب ، فعندما اطلعت على ملفها وجدت بأنها لقيطة ، وأصحاب الدار نبذوها لأنها كانت مشاغبة ، فأصبحت تعاني من أعراض تخلف عقلي بسيط.
وحدثتنا أيضا بأنه أجري دراسة بأمريكا بأن استأصلو جزء العاطفة من الدماغ فمات الرجل بعد ثلاثة أيام.
هذا يدل على مدى أهمية الإحتضان للطفل ، وما تفعلينه من إحتضان لبناتك كتير مفيد لهن .


5- اغرسي حب الصلاة في هذه القلوب الصغيرة ولتكن الصلاة أول ما تحب وتتعلم .
جدا مفيد لو استغليتي هذه الفرصة ، قومي بخياطة منديل صلاة لبنتيكِ وعندما تبدئي بالصلاة ألبسيهن إياه ، وستجدي بأنه في كل مرة تقفي للصلاة فيها قامو هن معك .
فعلك هذا جدا جدا مفيد لهن من عدة جوانب:
1- حركتهن في تمثيل الركوع والسجود مفيدة جدا في تقوية العضلات الكبيرة لهن ( عضلات الفخذ وعضلات الساعد).
2- هذه البذرة الأولى التي ستغرسيها في تحبيب أمر الصلاة لهن ، وستكون مفيدة ومساعدة لكِ ، فعندما يكبرن لن تحتاجي لأسلوب الترغيب والترهيب .
3- سيحفظ الطفل أركان الصلاة وطريقتها ، ولن ينساها أبدا ، لأن التعلم في الصغر كالنقش على حجر.

ويجوز أن تحملي الطفل وأنتِ تصلي لو صاح وبكى ، فقد حمل النبي صلى الله عليه وسلم أمامة ، ابنة ابنته زينب رضي الله عنها وهو يصلي، وكان الحسن والحسين رضي الله عنهما يصعدان على ظهره صلى الله عليه وسلم وهو ساجد فيتأخر في سجوده حتى ينزلا .

6- الطفل كثير الحركة دليل على ذكاءه
ما تضجري من كثرة حركة ماسة ، هاد دليل على ذكاءها ، وبكرة بإذن الله بتشوفي انها كتير نبيهة ، وتلقط الحكي وهو طاير ، أما لين فكمان هي ذكية طول ما انها ما بترجع تعيد أخطاء أختها وبتتعلم منها ، بس ما يغرك هدوءها .

وحركة الطفل مهمة جدا ، فهي دليل على صحته الممتازة من ناحية سلامة العظام وعدم إصابتها بكساح ، سلامة القلب لأن الطفل المجهد علامة من علامات إصابة قلبه ، الدم ممتاز لأن الخمول علامة من علامات الأنيميا ، النشاط دليل على عدم الشكوى من أي وعكة صحية .

فالحمدلله على هذه النعمة ، وأسأل الله أيديمها عليكِ وعليهن يارب العالمين.

مع إنه كتير بيتعب الموضوع من ناحية ، بس برضو الحمدلله بيطمئن من ناحية أخرى ، كمان هن توأم يعني اصبري اشوي بيصيروا يتفقوا على عمل المشاغبات سوا بس صدقيني هي فترة وتمضي ، وتضلي طول العمر تتمني يرجعوا صغار .

أسأل الله أن يجعلهن بنات صالحات بارّات بأمهن الطيبة وأقرّ عينك بهن حبيبتي ، إنه ولي ذلك والقادر عليه .

[راغبة في رضا الله]

اختي الحبيبة الغالية ,وفراشتي الحلوة :اشكرك جزيل الشكر,أسعدني كثيراً ما كتبتِ ,بارك الله فيكِ ولا حرمكِ الأجر
الحقيقة نصائح مهمة وان شاء الله بستفيد منها انا وجميع الامهات
وصحيح ما ذكرت ان الطفل بيفهم حتى لو كان صغير وبيحب يقلد ورح احكيلك هالقصة :
لما صار عمر بناتي 9 شهور الفت نشيد واتفقت مع زوجي رحمه الله انه رح يكون النشيد اليومي لعيلتنا وهي بسيطة
لا اله الا الله
اول درس تعلمنا
مالنا رب سواه
لا نعبد الا اياه
قولوا معايا يا اولاد
لا اله الا الله
محمد رسول الله
والكعبة بيت الله
لا اله الا الله
وكنت بتمنى انه اول كلمة يقولوها البنات :لا اله الا الله ,وكان النشيد مع الاشارة بالسبابة ,بالبداية بهداك العمر ما كانوا البنات يحكوا غير بب,مم,بس كانوا مجرد ما يسمعوا النشيد يأشروا باصبع السبابة بدون انا ما اعمل الحركة ويقولوا آا,آا,هيك يعني,وهلأ وصلوا لمرحلة بينشدوا لا لا لا لا
بظن شوي تانية بيقدروا يقولوها مظبوط ,والغريب انه مهما كانوا زعلانين وعم يبكوا مجرد ما بلش وانشد لا اله الا الله بيصيروا يضحكوا وبيأشروا بالسبابة,فهيك صحيح متل ما قلتي انه الطفل متل الاسفنجة بيتعلم منا كل شي بدنا نعلمه ياه وان شاء الله نعلمهن صح ونربيهن تربية حسنة ,لأنه انا كتير بطمح انه الجيل اللي جاي يكون أفضل بكتير من جيلنا
مرة تانية حبيبتي,بارك الله فيكِ ورزقك الفردوس الأعلى ,وناطرة من فراشتي المختصة بمرحلة رياض الاطفال مزيد من النصائح والتوجيهات