شكة إني مسحورة ونفسي أتأكد

[Nourhaan]

السلام عليكم
قصتي طويلة وانا مصممة احكيلكم كل حاجة عشان مش عايزة اروح احكيها لحد تاني ، فأرجوكم استحملوا طول الرسالة والتفاصيل

انا بنت طبيعية جداً وعندي أخت أكبر مني كتكوتة برضه ومن عيلة كويسة متعلمين جامعيين بنشتغل مؤدبين بشهادة إللي حوالينا، بابانا راجل نضيف جداً بشهادة إللي حوالينا وإللي ف إيده مش ليه زي ما بيقولو وعايشين في مستوى كويس والحمدلله

المشكلة فين؟؟!!! المشكلة إن عمري في أواخر العشرينات وأختي في أول التلاتين ومن ساعة لما كانت في الكلية ولغاية دلوقتي لما بيتقدملها حد وانا كمان زيها .. أي حد بيتقدم الحوار مبيكملش سواء صالونات أو معرفة .. سيبكم من بعض الناس إللي فعلاً بيبقوا مش مناسبين او مش بنرتاحلهم عشان نبقى حياديين برضه .. بس في مواضيع تانية بتبوظ من اللاشيء (والحمدلله جداً إن كلهم بيبوظوا في مرحلة الاتفاق وقبل قراية الفتحة)، الحمدلله الحمدلله أنا وأختي مؤمنين جداً وكان بتحصل مواقف كدة بعد ما الموضوع بيبوظ بkنحس ان ربنا بيطيب خاطرنا وبيطبطب علينا.

والحمدلله أنا وهي جوانا شيء مطمنا إننا هنتجوز بس نصيبنا هو إللي لسة ربنا مأذنش بيه
بس برضه من فترة كدة حوالي 3 سنين ابتدينا انا وهي نشك إن في حاجة مش طبيعية انا كان عمري حوالي 24 أو 25 وده عمر ميقلقش في الأيام دي بس لإني كنت شايفة إللي بيحصل مع أختي وبيحصل معايا توقعت إن أنا وهي يبقى معمولنا حاجة مثلاً..

المهم إننا احتفظنا بمعلوماتنا لنفسنا واكتشفنا إن ماما كمان كان عندها نفس الشعور وكلمت (من ورانا) مراة خالي وقال إيه أخدت صورتين لية ولأختي ودتهم لراجل الله أعلم بيقولو بتاع ربنا المهم إنه طمنهم وقالهم البنات مفهومش حاجة يس نجمهم خفيف (الترجمة: سهل جداً نتحسد) وهو مقالش حاجة جديدة بصراحة لاننا جتتنا نحست تقريباً من واحنا صغيرين بنتنظر والحمدلله لدرجة ان اختي (وهي شيك جدا في لبسها) لبسها كان بيبقى حلو وغالي ونلاقيه بيتنتش أو تحصله حاجات فجاة من اللاشيء (لدرجة ان لبسها بيتشاف من وهية بتطقمله ايشاربات وممكن يبوظ قبل ما يتلبس ، مرة أصلا كنا في مكان وحد قالها جيبتك شيك وحلوة مفيش 5 دقايق وكان السلم الكهربا بيبلع الجيبة وبيبلعها معاها هي كمان وكان يوم فرجة الحمدلله)، المهم سيبنا من الضحك ونرجع لمرجوعنا

بابا طبعاً مستحيل نعرف نكلمه في الموضوع ده كمان لأن أي أوبشن أو اجراء هيتاخد للموضوع ده هو رافضه (وعنده حق احنا بقينا في زمن الدجالين) المهم الحاج برضه كان حاسس من جواه ان في حاجة
وفي أحد لحظات الضعف الإنساني .. إذ هو إيه؟!! سمع من حد إنه يعرف حد بيعالج بالقرآن ومبياخدش فلوس وكدة وجاب رقم تليفونه وكلمه وقابله، الراجل ده قاله بناتك معلمولهم عمل

المهم جه الراجل البيت وقعد معانا وقرا علية أنا وأختى قرآن (بصراحة ساعتها مكنتش أعرف إيه هية الرقية الشرعية فمش فاكرة هو قرا ايه)
هو قالنا انتو اتعملكم عمل من سبع سنين ومن حد قريبكم بس أنا مش هقدر أقولكم مين عشان متحصلش مشاكل بينكم عشان انتو قرايب وانتو كدة كدة الحمدلله اننا عرفنا حاجة زي دي وهنركز في إن إزاي احنا نعالجها ،أكيد مش هندور على الشخص وتنتقموا منه مثلاً وفي نفس الوقت أنا هقولكم إزاي تحصنوا نفسكم عشان الحاجة دي مترجعش تاني

قرالنا على مية وقالنا نستحمى بيها وادانا زيت ندهن بيه بعدها وادانا بخور نبخر بيه جسمنا وقالنا نكرر الموضوع ده لمدة 7 ايام وان شاء الله كله هيبقى تمام

عايزة أقولكم ان احنا التزمنا بالكلام ده بس بابا رجع فاق وقال الراجل ده مش هيخش البيت تاني ولا هيشوفكم تاني عشان نعرف منه اذا كان موضوع السحر ده انتهى ولا لأ (هو بيخاف جدا جدا من الدجل خصوصا اننا ممكن نطلع من موضوع نخش في موضوع أكبر منه) وقالنا احنا ناس مؤمنين وطالما ملتزمين بقراءة البقرة يبقى عمر ما ربنا هيتخلى عننا ولا هيقدر اي سحر علينا إلا بإذن الله

الموضوع اتقفل إلى الأبد بس فضل جوانا برضه شك خصوصا ان نفس المواقف ابتدت تتكرر تاني .. الراجل يبقى مفهوش عيب وقبل خطوة قراية الفاتحة تحصل حاجة والحوار ميتمش

الراجل الشيخ اللي كان جالنا كان خلانا ناخد بالنا من بعض الظواهر إللي مكناش مركزين فيها ،وأنا أكتر من أختي لان من ساعة ما كان بيقرا علينا كان بيسال اسئلة والمفروض ردي عليها بيبقى اني اميل يمين او شمال مثلا وانا اللي كان جسمي بيستجيب للحاجات دي اكتر من اختي، الحاجات دي كانت على هيئة أسئلة وأعراض كان سألنا اذا كنا بنشوفها أو بنحس بيها ولا لأ زي: ان أحلم بحد بيتهجم علية ، او احس اني بحلم اني فجاة بقع مع اني نايمة على سريري (دي ماقتنعتش بيها قوي لاني بحب اشغل مخي وعارفة ان دي ظاهرة صحية مالهاش علاقة بحاجة تانية لا زيبق ولا غيره زي ما قال)، وظواهر تانية زي ان شعرنا يكون بيقع أو ننام لما نيجي نقرا قرآن ونتاوب

انا بأة رنت ف دماغي اننا فعلاً كتير كنا بنحلم ان حد بيطاردنا واحنا بنجري منه، أنا بأة تحديدا كنت مع الأحلام دي بحلم إن في حد عايز مثلا يعتدي علية او حد بيضربني أو عايز يقتلني وكتير من الأحلام دي كانت بتخلص على اني بقرا قرآن .. صحيح كتير كنت باجي أقراه في الحلم ألاقيني اخرسيت أو مش عارفة اطلع صوت واتكلم بس الحمدلله كنت في الاخر بقدر اني اقرا آية الكرسي والمعوذتين وبعد كدة اصحى مفزوعة وأقول الدعا وأتف من على شمالي 3 مرات لدرجة انه بقى روتين يومي (أصحى بلليل أتف عن شمالي أو أتقلب ألاقي أختي صاحية تتف هي كمان ورديااات بأة)

الأحلام دي قلت كتير جدا بعد الراجل ده ما جالنا وكنت حلمت حلم كدة في اخر السبع ايام ان عندنا ناس ساكنين معانا في البيت زي ما اكون عارفاهم او على صلة بيهم أو أصحابنا وانهم زي ما يكونوا بيلموا عزالهم وهدومهم وانا بساعدهم يمشوا يعزلوا والراجل كان طمني ان كل حاجة بقت تمام

من ساعتها باة وانا عندي هسهس ان معمولنا عمل ، خصوصا اني لما رجعت بالزمن ورا لقيت ان فعلا في الوقت اللي هو بيقول ان اتعملنا فيه العمل بالظبط لقيت اننا فعلا في السنة دي بالذات كنا سافرنا نزور اهل والدي (والدي مش عايش في محافظة اهله من صغره وبابا من القليليين جدا في عيلة بابا اللي جامعي (من جيله أقصد تقريبا هو الوحيد في كل اخواته وولاد عمه!!) وسافر وعاش برة مصر لغاية لما كبرنا وبحكم انه الكبير كان بيساعد اهله واخواته ماديا ومكانش بيتاخر حتى واحنا ظروفنا وحشة) ودي كانت اول مرة بحكم الغربة نروح كلنا انا واخواتي وماما وبابا هناك (كنا بنروح تخاطيف بابا وماما بس او بابا وماما وواحد من اخواتي وبس) المهم اننا سلمنا في السفرية دي على ناس كتير جدا (عيلة بحالها بأة) ودخلنا بيوت ياما وشربنا واجب ياما لما بقينا بنخر بيبسي وشاي وعصير

اهل بابا من صغري (والله العظيم ما قصدي أغتاب حد بس بجد انا بسرد وقائع عشان تحسوا باللي احنا عايشين فيه) وانا عارفة ان فيهم طبع الحسد والحقد ( لأ مش غبطة انا عارفة كويس الفرق بين ان واحد يغبطك وان واحد تاني يتمنى يتشفى فيك) وياما كانوا بيطلعوا اشاعات عن اموال واملاك خيالية عند بابا وهمية مالهاش اساس من الصحة (طبيعي الحاجات دي خصوصا لما تكون بلدهم صغيرة ووقت الفراغ فيها كتير)، ويقعدوا يبصوا على حاجتنا، لدرجة اني أقسم بالله مفيش مرة حد منهم زارنا في البيت (احنا في محافظة تانية) إلا وتحصل حاجة (مرة بابا يعمل حادثة ، مرة اخويا يتثبت بمطوة، مرة احد الاجهزة فرقعت وولعت ودي حصلت مرتين!! أو تحصل في بيتنا اننا كلنا نتخانق مع بعض خناقة عظيمة بلا داعي ونبقى مش طايقين لبعض الكلمة)
ومفيش مرة زرناهم احنا هناك (في المرات القليلة اللي كنا فيها هناك) الا ورجعنا تعبانين وبنرجع أي حاجة بناكلها، بهدلة يعني وممكن كمان يحصلنا حاجة في الطريق.

طبعاً مقلتش لبابا اني شاكة في حد منهم بس المفروض انه هو فاهم ،باينة قوي يعني

مؤخراً رجع الموضوع يزن في دماغي وخلاص وصلت لاني عايزة اخلص منه للأسباب الآتية:
*أكيد انا بنت زي بقيت البنات نفسي ارتبط بالزوج الصالح زأحبه ويحبني واجيب ذرية صالحة أدخل بيهم وبأبوهم الجنة إن شاءالله

*مؤخراً معرفش ابتديت احس اني بكبر ومحتاجة أكون مستقرة لوحدي في بيت بعيداً عن أسرتي ، مش لسبب معين ربنا يخليهوملي طبعا بس نفسي أحس اني عايشة في بيتي وفي خصوصيتي.

*ماما .. وما أدراكم ما الأمهات.. وزن الأمهات .. ولهفتهم عالجواز ، لدرجة ان أي عريس ياماااي تقوللي إنزلي شوفيه وفي حاجات أصلاً مفروض تكون سائلة عليها، تقولي لما تروحي اعرفي كل حاجة!! طب ليه وجع البطن ده بس؟!! أنا عارفة إنه بحسن نية وهي عايزة تطمن علية.

*نفسي أفرح أبويا الستيني بحفيد يقر عينيه، الراجل ده من حقه يفرح بأة بأحفاده، ربنا يخليه لية ويباركله في عمره بس أنا ابتديت أحس بحتة تقصير من ناحيتي، كل لما أبصله ببقى عايزة أقوله أنا آسفة يا أبويا إني مقدرتش أحققلك حلمك بانك تشيل أحفادك، هو الراجل مبيتكلمش بس لما بشوف تعامله مع الأطفال ولما بشوف أحفاد أصدقائه وأقاربنا بزعل عشانه.

*مش عايزة أدي أي حد فرصة إنه يقعد يتفرج علية وأنا سنين عمري بتضيع من غير ارتباط ويقعد يشمت فية، حزني الدفين مش هيكون موضع سخرية أو شماتة أي حد.

وعلى هذا اتخذت شوية اجراءات وقررت أتفرغ للموضوع ده وعقدت العزم وقمت بالآتي والله المستعان:
1- كان فيه محاولة فاشلة من 4 شهور للالتزام بقراءة سورة البقرة كاملة يومياً بنية الزواج (كنت قريت انها تبطل السحر وهية كدة كدة أصلاً بتحرس المسلم) أختي التزمت أكتر من 45 يوم متواصل وانا كنت بقرا يومين تلاتة وافصل يوم في النص للأسف، أختي بتقول إن الفترة إللي كانت بتقرا فيها البقرة كانت بتحلم أحلام وكوابيس مزعجة جداً وانها لما خلصت ال45يوم وبطلت قراءة مبقتش تحلم!!! (عامة هي مكانتش بتقول أذكار النوم والمساء فمش هربط ده بحاجة تانية)

2-صاحبتي كانت قالتلي انها قبل الزواج عرفت ان اتعملها سحر ماكول ضد الزواج وقالتلي أجيب ماء وزيت زيتون وأحط صباعي في الماء وأقرا آيات وأدعية الرقية الشرعية وسورة البقرة كاملة، وبعدين أشيل مية على جنب عشان أشرب منها لمدة كذا يوم وبعدين بلليل قبل النوم أستحمى بباقي المية ،وأدهن جسمي كله كله حتى شعري بزيت الزيتون (إللي هشيل الباقي منه واستخدمه في الأكل على قد ماقدر)

الخطوة التانية أني هجيب نبتة السنامكي من عند العطار (وأغلي منها 20جرام في أكتر من 3 كبايات مية من المية إللي قريت عليها) وأسيبها تغلي مدة 10 دقايق وبعدين أنقعها ساعتين وأصفيها وتاني يوم عالريق هشرب ال3 كبايات ومعروف انها بتنضف البطن والأرحام والمفروض ان أي سحر مأكول هيبطل باذن الله (هية بتعمل الله يعزكم اسهال بمغص عشان المواد الملينة القوية اللي فيها)، وقالتلي إن النتيجة هلاحظها خلال شهرين تمام زي ما حصل معاها هي شخصياً
قريت أنا كمان الكلام ده على جوجل واتاكدت من كذا مكان

صاحبتي بتقوللي ان لازم التزم بقراءة البقرة يوميا وباذكار الصباح والمساء والنوم مع الثقة التامة بقضاء ربنا والبعد عن المعاصي

3- قررت التزم بمواعيد الصلاة حتى الفجر (بحيث مع اقامة الصلاة في الجامع أكون أنا صليت) والالتزام باذكار الآذان والصلاة والوضوء والصباح والمساء والنوم وصلاة السنن على قد ما أقدر وصلاة الحاجة والشفع والوتر

4- الاكثار من الدعاء والاستغفار والدعاء ب (رب إني لما أنزلت إلي من خير فقير)

5-كمان عرفت ان ورق السدر بيبطل السحر وقريت في كذا حتة الكلام ده، جبت سبع ورقات حطتهم في مية وقرأت الرقية الشرعية وشربت من المية دي 3 كبايات كاملين وبعدين استحميت جسمي كله بالمية دي.

6- التزمت بما أخبرتني به خالتي المسنة بان ادهن ليلاً قبل النوم جميع فتحات الجسم بدهن المسك الأسود (حول العين وفتحة الأنف والأذنين والفتحات التناسلية الله يعزكم) وصباحاً أدهن من زيت الزيتون المقري عليه ( قريت فعلاً في أماكن كتير إنه بيحفظ الجسم من المس.)


السؤال دلوقتي انا عندي ثقة تامة في نصيب ربنا بس حاسة إني لازم أعمل حاجة (اسعى يا عبد) يعني أنا جوايا شك مش عارفة أخلص منه، هل فعلاً في عمل أو سحر لم يبطل؟!! نفسي ألاقي إجابة : آه أو لأ !!
الحاجات اللي بعملها دي !! تنصحوني بحاجة زيادة أعملها؟!!
في حد حصله حاجة من دي قبل كدة؟؟!!
حد عنده خبرة في الحاجات دي يا فتوكات أو يقدر يسألي؟؟


مش قدامي غير إني أسألكم لأن والدي بيرفض أشوف أي حد وسمعت عن كذا حد كويس من المعالجين بالقرآن لوجه الله ومبياخدوش فلوس ، بس برضه والدي بيرفض تماماً مجرد الفكرة، وبصراحة كلامه صحيح أنا معايا عبادتي وقرآني وإيماني بربنا يبقى أكيد ربنا مش هيخذلني ومش هحتاج وساطة من حد ،هي الفكرة بس إن الناس دول هيجيبولي من الآخر ويقولولي في حاجة ولا لأ قوم أنا أرتاح...(وانا تحت أي ظرف مش هروح أي مكان غير بعلم بابا، ولو موافقش يبقى نصيبي كدة ومش هروح...)

(ملحوظة: في شيخ هو صديق شخصي لبابا بس من محافظة غير بتاعتنا وكان بيشوف بابا من وقت للتاني وهو راجل طيب جدا جدا ، مبيعالجش بالقرآن بس بيقعد يتكلم معانا كلام كويس جدا جدا وزارنا كذا مرة في البيت ، الكلام معاه مريح لدرجة انه بيحسسنا قد إيه احنا مقصرين مع ربنا وبيخلينا نقبل على العبادة
المهم الشيخ ده استأذنا بابا وكلمته أختي وحكتله على الراجل اللي قلنا ان في سحر وقلناله كل حاجة، واهتم ساعتها جداص بالموضوع وقالنا اوعوا تخشوا في السكة دي وانا في اقرب وقت (خلال اسبوع) هاجي ازور الأسرة ونتكلم زي كل مرة .. سبحان الله الراجل علاقتنا شبه اتقطعت بيه من بعدها وكل منكلمه عالموبايل نلاقيه مقفول ولو حصل بالغلط وحد مننا وصل للتاني بيحصل حاجة تعطل المكالمة او مجرد الاتفاق على زيارة!!!

.. ساعدوني أرجوكم

[صفاء الروح]

السلام عليكم و رحمة الله تعالى و بركاته

اختي الكريمة
احب ان اخبرك لو اردتي ان تتاكدي
انك معمول لك عمل او اي شي مما تقولين
استمعي للرقية الشرعية
و للقران و اكيد هي الشافية بادنه تعالى

و تانيا اختي انا ملاحظة انك تقولين مند كنتم صغار و اختك بتنحسد
و الكلام دا...ممكن اكيد
لكن ما اريد قوله اختي
انها فكرة كبرت معك انت و اختك مند كنتم صغاااااااااار
بمعنى ....ممكن يكون كلامك صح
بس انتو كبرتوها و اصبح الاهتمام بها اكثر
و تم ربط الحسد و العين بما هو مقدر لكما
يعني لما اتاخر الزواج ( مع العلم انه لو يتاخر هو
لم ياتي وقته و بس)
قلتو اكيد معمول لنا عمل
اخـــتـــــــــــي
بالله عليك لا تنجرفي وراء ما تنظنين و ما تشعرين به
من امور الحسد و العين و معمول لنا عمل ...
كوني محسنة الظن بربك و الله
لن يصيبك الا ما كتبه اله لك
و الله ادا كان مقدر لك الزواج و الله سوف تتزوجين لكن حين يريد الله
اسمعــــــــــــي اختي
احيانا يكون مقدر لنا هدا و داك...
و لكن قلة صبرنا و عدم ادراكنا لما هو خير لنا
نتسرع و نرتكب معاصي كثيرة
و بالنهاية حين يريد ربك ما استعجلناه نحن بالمعصية
يقــــــــــول له كن فيكون


ادعو الله ان ينير دربك و اختك
و كل بنات المسلمين
بنور الحق المبين