الحكم التكليفي

[أخت الغرباء]

السلام عليكم ورحمة الله وبركاته

3- الحكم التكليفي

فاكرين لما قلنا في تعريف الحكم الشرعي أنه :

خطاب الله تعالى ، المتعلق بأفعال المكلفين ، اقتضاءً أو تخييراً أو وضعاً.وقلنا عند شرح ( اقتضاءً أو تخييراً أو وضعاً ) إن هنا بيان لأقسام الحكم الشرعي
واليوم بإذن الله هنتكلم عن النوع الأول وهو الحكم التكليفي

وسنجده في عبارة (اقتضاءً أو تخييراً)
فخطاب الشارع إما أن يقتضي ويطلب الفعل( الواجب والمندوب)
يعني يأمر بشيء نعمله سواء على وجه الوجوب أو الاستحباب
فيأمرنا بالصلاة والصيام والزكاة ،
وأمرنا الله بها على سبيل الإلزام يعني فروض علينا لازم كل مسلم يعملها

أويأمرنا بالسواك وركعة الوتر وقول أذكار الصباح والمساء مثلا ،
ودي سنن ياريت نعملها بس مش واجب علينا ولا نأثم لو تركناها لكن بنضيع ثواب كبير


وإما أن يقتضي ويطلب الكف وترك الفعل ( المحرم والمكروه )
يعني يأمرنا بشيء نترك فعله ونبتعد عنه لأنه محرم أو مكروه
فمثلا أمرنا أن نترك الكذب والسرقة وأكل الميتة والتجسس على عورات الناس
وكل ده من المحرمات لازم كل مسلم يجتنبها

أو نهانا عن الصلاة بحضرة طعام والأكل من كل نواحي الطبق
وكل ده من المكروهات ياريت نجتنبها لكن لو عملناها مفيش ذنب علينا

وإما أن يخير بين الفعل والكف. ( المباح )
يعني نتركه أو نعمله مفيش مشكلة
مثل الأكل من طعام أهل الكتاب



إذن عندنا احكام كتيرة
فما هي الحكمة في تعدد الأحكام الشرعية ؟
الحكمة في ذلك هي التخفيف على هذه الأمة، وذلك بتنويع المأمورات والمنهيات من وجوب وندب وتحريم وكراهية وإباحة، لأن النفوس والهمم تختلف فمِن مقتصرٍ على الواجبات وتاركٍ للمحرمات إلى مُتَرَقٍّ بالمندوبات والفضائل وتاركٍ للمحرمات والمكروهات.




لكن عندنا مشكلتين أساسيتين في حياتنا
الأولى : عدم اهتمامنا بمعرفة الأحكام والأمور المحرمة والأمور المباحة في الشرع
والثانية : عدم تعظيم حكم الله في نفوسنا والعبارة الشهيرة متحبكوهاش

هل من المعقول إن فيه مسلمات للآن مش عارفين الحجاب فرض ولا لأه ؟
هل من المعقول إن فيه مسلمات بيسألوا عن السنن الرواتب وعددها؟
ولو سألناهم عن حياة الممثل الفلاني أو الأغنية الفلانية هيبقوا عارفين كل حاجة وبالتفصيل

الواجب على المؤمن أن يتعلم ويتفقه في الدين ويسأل أهل العلم ، كما قال الله سبحانه :" فَاسْأَلُوا أَهْلَ الذِّكْرِ إِنْ كُنْتُمْ لا تَعْلَمُونَ" وقال عليه الصلاة والسلام :"من يرد الله به خيرا يفقهه في الدين"

فالواجب على الرجال والنساء من المسلمين التفقه في الدين ؛ والسؤال عما أشكل عليهم ، وعدم السكوت على الجهل ، وعدم الإعراض ، وعدم الغفلة ؛ لأنهم خلقوا ليعبدوا الله ويطيعوه سبحانه وتعالى ولا سبيل إلى ذلك إلا بالعلم ، والعلم لا يحصل بالغفلة والإعراض ؛ بل لا بد من طلب للعلم ، ولا بد من السؤال لأهل العلم حتى يتعلم الجاهل .




ما هو العلم الواجب على المسلم أن يتعلمه؟
عندنا 3 أقسام :
1 ــ العلم الواجب العيني العام:
لازم كل مسلم ومسلمة يكون عارفه مثلا عقيدة المسلم ودي مهمة جداااااااااااااااااا ، حفظ سورة الفاتحة ، صفة الوضوء والطهارة ، صفة الصلاة ، أحكام الصيام ،المحرمات من الأقوال والأفعال
باختصار تعرفي أساسيات الدين كلها وإيه الحاجات اللي تخلي عبادتك صحيحة وإيه الحاجات اللي تفسد العبادة وتجعلها غير صحيحة
و ده فرض علينا

2 ــ العلم الواجب العيني الخاص:
ده حسب الشغل اللي بتقومي بيه
يعني اللي بيشتغل في التجارة لازم يبقى عارف الحلال والحرام في البيع والشراء وهكذا

3 ــ العلم بأحكام النوازل:
الأمور اللي بتمر عليه في حياته ومش عارف حكمها يسأل فيها اهل العلم




والأمر المهم الآخر إني أعظم حرمات الله وأحكامه
مينفعش حد يقولي اللي بتعمليه ده حرام أو بدعة وأقول أنا شايفة إنه مش حرام متحبكوهاش
الدين مش على هوانا
أو تقولي معلش أنا عارفة إنه حرام بس مش هأقدر أسيب المعصية دي دلوقتي
بمجرد ما تعرفي الحكم بقى حجة عليكي ويبقى فورا تنفذي وتلتزمي بأمر الله

اللهم اجعلنا من الذين يستمعون القول فيتبعون أحسنه